Originally samaSwazi sifike kwaZulu ngenxa yenkosi uShaka.
Kwakunesomiso kwesenkosi uShaka; kufa abantu, imfuyo isha, ngisho ukudla emasimini. Abantu benkosi uShaka babengasakwazi ngisho ukuhleka ngenxa yesomiso. Wathumela ibutho enkosi uSobhuza wokuqala ukuba kuyocelwa uMzobe agonise izulu esizweni senkosi uShaka.
Nebala kwabanjalo! Safika kwesenkosi uShaka, sagila izimanga. Kwasa ngakusasa sekukhona amazolo, into eyayingasaziwa, kwadlula lane izulu. Inkosi yasigxoshisa ngezinkomo; sanikezwa indawo, sakha umuzi waba inxuluma. UMzobe wabekwa njengenye yezinduna zasebukhosini.
Okwathi ukuhamba kwesikhathi, uShaka wabiza izangoma nezanusi ukuthi nazo azinise izulu njengalokho kwenze uMzobe. Zazama zahluleka, zancama. Inkosi yabe isitshela uMzobe ukuba afundise izangoma nezanusi ukuthi ulinisa kanjani izulu. Hawu! Wala! Waphetha uNgcolwane ukukhipha imfihlo yakithi.
Lokho kwayicasula kakhulu inkosi uShaka; wabe esekhipha ibutho ukuthi lihlasele isizwe sikaMzobe, kwazise phela sasesande sikhulu kweliMthaniya. Salwa nebutho lenkosi uShaka, salinqoba. Lokho kwathukuthelisa inkosi uShaka; yabe seyijuba ibutho elalinamandla elalibizwa ngokuthi iNyonikayiphumuli. Lelo butho lalwa nesizwe soNgcolwane, salokhu sihlehle njalo, saze sayowela uThukela, sehla njalo sigudla usebe lolwandle, saze sazobhajwa kwelamQadi (Thekwini).
Kanti nempi yayilokhu isihubhe njalo. Lokho kwenza ukuthi siqhubeke sigudle usebe, sadlula kwelamanzi amtoti, saze sayobhajwa kwelamaPondo. Yingakho namhlanje unoMzobe abangcwele kwaMaphumulo, eThekwini, Toti nakwelamaPondo.
AbasePondoland bafika lapha babizwa ngokuthi abantu basematolweni, kushiwo amazolo. Hawu! Lezi zakithi zavumela phezulu ukuthi zona zingoMtolo, kanti nathi umsuka wethu singoMzolo, hhayi uMzobe. Kodwa ngenxa yabantu benkosi uShaka ababethefula, bahluleka ukuthi bathi singabaseMazolweni ngoba safika kwesenkosi kwaba khona amazolo; bona babethi singabasemazobweni, kwase kuzaleka uMzobe.
Ikhehla okuyilo elaliphethe isikhwama kwakunguMlenz’bovu yombili, nalelo gama walethwa zinsizwa zakithi ngoba bamugwaza ethangeni ngomkhonto, waphumela kwelinye ithanga, kodwa waqhubeka wala, khona kunjalo. Ingakho singoWalawala; uzokhumbula ukuthi wala, wala, waphetha nesikhwama sakithi.
SingoMnisi bemvula ngoba safika kwaZulu sanisa izulu. SingoBonisa abantu ukuhleka ngoba babengasakwazi ukuhleka abenkosi ngenxa yesomiso esasibulala kwasani. Kwagika thina, bahleka abantu; ingakho singoHlekani.
Ibinda wena wenkosi!
by Mdu “Chief” Mzobe (directly added by the guest on this blog)