SERETO SA KOLA

Kola wee!!!!
Ke Kola marwa diala,
Ke mašole, mahlabana ntwa,
Ke maphodisa a motse a bo Nkgodi,
Ke batho ba bo setekuteku sa bo Mmapula,
Seteku setekuma hlogo ge e le mmele wona o ituletše

Ke ditlogolo tša popoduma ntweng,
Tša Kola morwa Mmatswabola,
Tša Mokgesi a makgale,
Yo a kgesitšego tšhukutswa kua lekwaleng,`
A re mma yona o kae, a tšwe re e bolaye

Re batho ba bo tsutsumetša mabotla dinkwe,
Ba bo mosesane wa ko leswikeng la Mma-kgetlwana,
Ba bo phatša ya mašia go tswala,
Phatša yabo Mmantšeele lekula la Ramongwana

Ageee!!! Rangwane dikgošhi,
Ke Mosa wa bo Solomon,
Ke ngwana Makibelo swana,
Sehlaga sa mmamainanoke godimo ga se okame,
Se okama ke dingaka, se okama ke bo Makgoka a Mphakane

Ditlogolo tša mmane a dikoketšo Malapa,
Yo a lapilego a etswa kgonyeng le batho,
Bare mmea Molebogeng o sepela bjang?
Nkane o gakantšha metsamayo?
Are ke phereke ra mosita ke go sepela.

Educational videos