Category: Uncategorized Page 6 of 12

TENTAKUTSI
———————-
KUTSI NYONDLO
Kusho kusuka uphume ngemnyango, kutsiwa utsi nyondlo, ikakhulu endlini yesiSwati lelefuna kwekutsi ube ngatsi uyakhotsama nawuphuma.

KUTSI NGANYA
Kusho kuhlola njengasemnyango nje nawungephandle uhlola ngekhatsi, kutsiwe utsi nganya. Kantsi kuyashiwo futsi nekuvela uvelele kubantfu bahleti.

KUTSI GOLOJA
Kusho kusuka uphume nako.

KUTSI LUCU
Kushiwo kuvutfwa kakhulu kwenyama uma seyilvitsika (ilucuka), kutsiwa ivutfwe yatsi lucu.

KUTSI NCITSI
Kusho kushisa kamnandzi ngekhatsi endlini nakubasiwe, kutsi kushisa ncitsi. Nendzawo leshisako kutsiwa kusemncitsini.

Awngete takho nawe Ngwane tentakutsi

TIBONGO TENGWENYAMA DLAMINI WESITSATFU

Dlamini wesitsatfu utalwa nguLudvonga waMavuso, iNgongoni yeMavaneni, amtala entfombini yakaShiba. Emabito akhe ekutalwa kwakunguDambuza naLadzandzalukane. Lelinye labebitwa ngalo kwakunguSidvwabasilutfuli, ngobe ubuse bakaNgwane ngalesikhatsi besuka ngale kweLubombo baze batewufika lapha ngaseLuphongolo, lapho afike wakha khona umuti waseZibayaneni dvute nemfula Luphongolo. Njengobe kwakuhlalwa kuyalukwa-ke kuyalukwa live lelihle lekwakha tidvwaba kubomake tase tihlala tilutfuli. Kwase kutsiwa-ke nguSidvwabasilutfuli singabancwaba seta nemlandzakati, sibanga indlala. Leminye imiti yakhe kwakunguseMavaneni, naseNkhanini. Yena Dlamini utele Ngwane wesitsatfu.

Dlamini weNgongoni yeMavaneni.
Sidvwabasilutfuli longeweli ejubujweni lelishonako,
Uwela ngelesihlabatsi.
Mlawulela sive sakho ngendlela
Iya eMagubheni eNkhalaneni,
Ngekuncabela tive tikuhlasela kulaseMzimbayaneni.
Wamnika Ngwane indvuku;
Wachubeka nesive semaLangeni.
Msala yedvwa lowavutsekelwa ngebemlandvo
WaDlamini nesibili.
BeNguni bakutselekela ngetikhali,
Bebafuna litulu.
Umtsekeletile Ngwane.
Lowancengwa ngemadvuna neticu kumaLangeni,
Ngendvuna lenguDlamini
Letsandza kunyamalala.
Wasala wedvwa kaHlatsikhulu.
Nkhosi!
Wena weMavaneni!

UMUNTFU UTALA AZE AYEKUFA
—————————
Lesaga sisho kwekutsi noma ungakhulisa ucedze bantfwabakho bakhule babe badzala kepha bakhona labanye labasetawudzinga kukhuliswa njengebatukulu. Kulesinye sikhatsi kufa kuyafika kutsatse umtali bantfwana basale batingedzama sekutawufuneka umuntfu lotakubakhulisa. Ngako-ke nome sewucedzile kutala kepha ngoba solo uyakhulisa bese emaSwati atsi umuntfu utala aze ayekufa.

EMATINYO TINTSABA/LIGUMA
—————————
kutsiwa ematinyo tintsaba noma liguma ngoba afihle lukhulu, umuntfu uyasineka nawe wena utitjele kwekutsi uyakutsandza kantsi awuboni enhlitiyweni yakhe. Ungabombuka umuntfu akuhlekisa utsi wena uyakutsandza ngoba lamatinyo afihle lokukhulu.

LIGUNDVWANE LIPHILA NGEMAJOBO ESIHAMBI
—————————————
Uma usekuhambeni ubogadza kwehlwelwa tintfo letimbi. Kuphindze kutsiwe lichwa litondza sihambi. Umuntfu utsi avakashile ekhaya avuke atitfwaphuta akhala ngemazeze lamlume busuku bonkhe kepha nine balakhaya angakanenti lutfo. Nakadzeni-ke bekunjalo sitsi sihambi siyavuka sikhandza lijobo laso selinembobo yemagundvwane kepha lelikhaya linemajobo lagaciwe noma emshayweni langazange sewadliwe ligundvwane. Kunjalo ke ekuhambeni. Kungako siSwati siphindze sitsi kuhamba kunyatsela emasimba ebantfwana ngoba ekhaya lelinebantfwana ikakhulu nabasafundziswa kutitfuma batitfuma ebaleni utsi uyafika wena sihambi sonyatsela lamangcoliso abo.

INKHONJANE YAKHELA NGELUDZAKA
———————————
inkhonjane uma yakha sidleke sayo isakha ngeludzaka lelwenta tindilingana letincane isolo ibhaceka kudzimate kuphele. Uma isacala ungayitsatsa kancane utsi ngete saphela lesidleke kepha sigcine siphelile solo ibuyela iyekwenta loludzaka ibuye ibhaceke. Nasemphilweni kunjalo, tintfo ngete talunge masinyane kepha ngekubeketela nekungalahli litsemba utawugcina uphumelele. Baphindze labadzala batsi inja iyawacedza emanti ngelulwimi ngoba inja ayiwahubi manti njengaletinye tilwane kepha iyawaphakamisa ngalolulwimi lwayo. Uma uyibuka ungatsi lesitja ngete yasicedza noma ngete yakholwa kepha iyanatsa aze aphele lamanti.

INKHONTO IYANCENGWA
———————-
lamagama akhulunywa kakhuku kubomakoti nabendzile ngoba ngesiSwati bayafana nebantfu labakhontile kulelo khaya, vele makoti nangena ekhaya ucala ngekucela inkhonto kumaketala wakhe. Nemuntfu nasemsebentini ufana nemuntfu lokhontile kuloyo mcashi wakhe. Uma-ke ukhontile ubotati kwekutsi sigaba sakho wena usikhonti kunetintfo longatenta kunetintfo lokungafuneki utente, utfobele umtsetfo walabo labangetulu kunawe kuze ube nenhlalakahle kuleyo ndzawo. Ungatfolakali sewenta ngatsi uphetse endzaweni lophetfwe kuyo.

KUNGAHLWA KWENILE
——————-
Ebusuku uma sekumnyama kukhulu lokwentekako lebengete kwenteka emini, tonkhe tigameko leshwacisa lugogo tentiwa ngalesikhatsi kumnyama. Kuyafana-ke nekutsi nalishona kuvele kumile umena lapho ukhandza khona tonkhe tinhlobotetilwane letiyingoti, lokusho kutsi ubocaphela ebumnyameni ngoba buyafana nemena longalunywa yinyoka ibaleke ingene khona.

INHLWA AYIBANJWA NGENHLOKO ISAVELA
————————————-
Uma uve indzaba letsite kepha wangayiva kahle, ubobindza ushaye shangatsi awati idzimate ivele lendzaba iphelele kahle khona uteyikhuluma kahle noma sewutsatsa tinyatselo utitsatsele entfweni loyatiko ungahatsateli. Kufana nenhlwa ngoba ihlala emgodzini uma uyibamba uboyilindza iphume iphele ngukhani ke utayibamba ngoba wetama kuyibamba kusaphume lenhloko itawuvele isitsele ungabe usayitfola nekuyitfola.

KUNGAHLWA KWENILE

Uma sekuhwalele tinyenti kakhulu tinyenti kakhulu tintfo letentiwa ngebantfu lebengete batenta emini. Kuhlwa kufana nemena wona ufihla tonkhe tintfo, ngoba emeneni awukhoni kubona kutsi kunani. Nanasekuhwalele-ke kunjalo.

INGWE IKHOTSA EMABALA AYO LAMHLOPHE NALAMNYAMA

Umtali kufanele kwekutsi bantfwabankhe abatsandze ngekulingana bonkhe, angabi nekubandla. lesaga sisuselwa ekutsini ingwe uma itikhotsa, ayiwakhetsi emabala ayo, kepha iwakhotsa onkhe.

KWAKHO NGULOKUDLILE

Bunandzi bekuba nentfo kuyisebentisa usitakale ngayo. Uma ungakayisebentisi, nome usho kutsi yakho kodvwa awubati bunandzi bayo. kufana nekutsi utsi unekudla, kepha solo ungakudli. Ungete watsi kwakho ngobe bunandzi bako awukabuva.

IMIPHANDZA IBULAWA TAKHELANI.
Akusibo bantfu labakhashane nawe labavama kukulimata, kepha kuba ngulabo labasondzelene nawe labakwati kahle. Umphandza yimbita lenkhulu lehlala emsamo. Ngendlela umphandza lomkhulu ngayo uyambelwa lapha emsamo incenye yawo isitsele emhlabatsini bese uyasindzelwa lamaceleni, awususwa, uhlala khona lapho. Ubalulekile-ke umphandza ekhaya lesiSwati ngoba ngulapho kuhlala khona netjwala bemadloti nakunemsebenti. Umuntfu lokubulalela umphandza wakho nje usuke akubulele. Akusiye-ke umuntfu longawati umuntfu loyo, kephana kuba ngumuntfu lowati kahle kutsi utabe ukubulele sibili uma akubulalele umphandza.

INALA KAYIHAMBI, KUHAMBA INDLALA

Intfo lenhle umuntfu layentako ayivami kudvuma kakhulu, kepha kudvuma leyo lembi lake ayenta. Ingani nome iminyaka lekhunjulwa kakhulu yiminyaka yendlala, hhayi leyenala.

IMBIBA IDLA YETAYELE.
Umuntfu lapho asitakala khona utawuphindze abuyele uma asenhluphekweni. Noma umuntfu sewake wamsita, utakutsi lapho adzinga lusito futsi abuye kuwe atewutigicita. Imbiba yinhlobo yeligundvwane, itsi lapho itfole khona kudla seyitawuhlale ibuyela kuleso sikhowa sayo. Bese sitsi-ke siSwati imbiba idla yetayele.

TAGA SESISWATI

IMBIBA IDLA YETAYELE.
Umuntfu lapho asitakala khona utawuphindze abuyele uma asenhluphekweni. Noma umuntfu sewake wamsita, utakutsi lapho adzinga lusito futsi abuye kuwe atewutigicita. Imbiba yinhlobo yeligundvwane, itsi lapho itfole khona kudla seyitawuhlale ibuyela kuleso sikhowa sayo. Bese sitsi-ke siSwati imbiba idla yetayele.

IMIPHANDZA IBULAWA TAKHELANI.
Akusibo bantfu labakhashane nawe labavama kukulimata, kepha kuba ngulabo labasondzelene nawe labakwati kahle. Umphandza yimbita lenkhulu lehlala emsamo. Ngendlela umphandza lomkhulu ngayo uyambelwa lapha emsamo incenye yawo isitsele emhlabatsini bese uyasindzelwa lamaceleni, awususwa, uhlala khona lapho. Ubalulekile-ke umphandza ekhaya lesiSwati ngoba ngulapho kuhlala khona netjwala bemadloti nakunemsebenti. Umuntfu lokubulalela umphandza wakho nje usuke akubulele. Akusiye-ke umuntfu longawati umuntfu loyo, kephana kuba ngumuntfu lowati kahle kutsi utabe ukubulele sibili uma akubulalele umphandza.

INALA KAYIHAMBI, KUHAMBA INDLALA.
Intfo lenhle umuntfu layentako ayivami kudvuma kakhulu, kepha kudvuma leyo lembi lake ayenta. Ingani nome iminyaka lekhunjulwa kakhulu yiminyaka yendlala, hhayi leyenala.

INGWE IKHOTSA EMABALA AYO LAMHLOPHE NALAMNYAMA.
Umtali kufanele kwekutsi bantfwabankhe abatsandze ngekulingana bonkhe, angabi nekubandla. lesaga sisuselwa ekutsini ingwe uma itikhotsa, ayiwakhetsi emabala ayo, kepha iwakhotsa onkhe.

KUNGAHLWA KWENILE.
Uma sekuhwalele tinyenti kakhulu tinyenti kakhulu tintfo letentiwa ngebantfu lebengete batenta emini. Kuhlwa kufana nemena wona ufihla tonkhe tintfo, ngoba emeneni awukhoni kubona kutsi kunani. Nanasekuhwalele-ke kunjalo.

KWAKHO NGULOKUDLILE.
Bunandzi bekuba nentfo kuyisebentisa usitakale ngayo. Uma ungakayisebentisi, nome usho kutsi yakho kodvwa awubati bunandzi bayo. kufana nekutsi utsi unekudla, kepha solo ungakudli. Ungete watsi kwakho ngobe bunandzi bako awukabuva.