Tag: tawe Page 23 of 707

MaMphutlane a Makeka
Motho wa MaMphutlane a Makeka,
Motho wa boNkoriba le Tsotelo,
Motho wa ha MaMahlosi a Nakedi,
E re a eja, a kgore,
Ke re ke lekgukgutshatshwana,
A yo le ja le mosadi wa hae,
A yo le ja le MmaModiehi,
Motho wa boMothibe le Mmalane!

Mamphane
Ke Mofokeng,
Ngwana kgomo e tshwana,
Kgomo ya seema ka lelebe thoteng,
Ya nna ya hlaba mangope ho heleha,
Ke Lemphane,
Ke ngwana kgomo e tshwana,
Ya ho ema thoteng,
Motho wa Maletlapa ha le ribollwe,
Ekare o le ribolla, motho a hlaha,
Motho wa Mamosonotsokotsa,
Motho wa Mannywana,
Motho wa Mamalebe!

Mantoto
Ke thella jwang,
Ke le motho wa Mantoto,
Motho wa Maletlapa ha le ribollwe,
Wa Malejanasehlotshwana,
E a kgopa, Ramotshedisi,
E seng e kgopa basadi ba batho,
Motho wa Malejanasehlotshwana,
Motho wa Mahlonohlono,
Motho wa Maphakamisa molense,
Motho wa Mahlono e a phoma.

Maotwana finyela
Mofokeng wa Maotwana finyela,
Maoto a makaalo ka dinaledi,
A kaalo ka jwang ba tshaane, molelengwane,
Ke Mofokeng wa ha Mokgadi a Motlalane,
Mofokeng wa ha Manti a Mmope!