Makhoakhoa…

Ke thelleleng ke Lekhoakhoa la Selimo Nthole,

U nthole mokopu le maraka, ke imetsoe,

Oabo Lijo, oabo Moselane,

Habo Lijo ho hlabana lithotsela,

Li hlabana le ba shoeleng marumong,

Thotsela se hlooho-kholo, Tumane,

Re bolela tse ka mots’eo ho ntlo,

Oa ma-Pohosela.

Bang ba re;

Ke thelleleng ke le Lekhoakhoa labo Selimo Nthole,

Khoakhoa le Maphutse le maraka-raka,

Nthole Maphutse ke imetsoe,

Ha habo Lijo ho hlabana lithotsela.

Bang ba re;

Ke thelleleng ke le Lekhoakhoa la Selimo,

Lekhoakhoa la Selimo, Nthole,

U nthole mokopu le maraka, ke imetsoe,

Oabo Lijo, oabo Moselane,

Habo Lijo ho hlabana lithotsela,

Li hlabana le ba shoeleng marumong,

Thotsela se hlooho-kholo Tumane,

Re bolela tse ka mots’eo ho ntlo,

Oa ma-Pohosela..

Makhoakhoa ke bo-mang?

-Taba e ileng ea tuma, eaba ea jaleha, ke ea hore Makhoakhoa a ana ka mokopu, ha se ‘nete taba eo.

-Makhoakhoa ke bana ba Molapo, mora oa boraro oa Napo, Napo oa Mosito, Mosito oa Koena, Koena oa Malope, Malope oa Masilo, Masilo oa Morolong..