Tag: sunderland Page 3 of 4

TINTSANGA ATINCISHWE IMILIBA
Lesaga sishiwo uma kwekhutwa umuntfu kwekutsa angabe asaya endzaweni letsite, kumbe angabe asatiphatsa ngendlela letsite. Sibonelo- ” Sekubi langephandle kulamalanga mntfwanami, tintsanga atincishwe imiliba kulokubuya ebusuku kwenu.”

EMAPHIKANKHANI AFELA ENKHANINI
Umuntfu longalaleli uma ekhutwa elulekwa utawutikhandza sekasenkhingeni kusasa ngalokuba nguGandz’ etjeni kwakhe.

KUHLUPHA YONA INDLEBE LEVAKO.
Kushiwo umuntfu ekhutwa angafuni kulalela. Kutsiwa kuhlupha nje ngoba lendlebe iyeva, kube uyakhona ngabe uyayivala nayo ingakuva lokwekhutwa.

NALOMUDZE AKABONI AKABONI KAZULU.
Nalotsi uhlakaniphe kanganani kukhona langakwati. Lesaga sachamuka lesiya sikhatsi KaZulu kusabaleka bantfu labanyenti babheka enyakatfo, bebatsi nababaleka linyenti labo lengca kaNgwane njengaboSoshangane. Sekutsiwa-ke nalomudze akaboni kutsi kwentekani KwaZulu.

INDLU SIFU.
Ungabokhuluma ngemuntfu usendlini, kumbe nje ulangephandle uva konkhe, nawo emasondvo enyantsi kuwe!!

LICHWA LITONDZA SIHAMBI.
Umuntfu uma asekuhambeni wehlelwa ngito tonkhe tintfo letimbi bantfu bendzawo letingabehleli, kudzine kumangalise nje. Bese kutsiwa awu nembala lichwa litondza sihambi.

TAGA TESISWATI

EMEHLO NAMABILI AYABONISANA.
Kuhle kuba nebantfu labakubonisako lapho wenta khona emaphutsa, ngako ungenyanyi uma umuntfu akutjela emaphutsa akho ngobe uyakulungisa kutsi wente lokungiko.

HAMBA SANDLA, BUYA SANDLA.
Kuyasitwana nanibantfu. Kungabi kutsi wena solo ucela lusito kepha umuntfu nasafuna lusito kuwe sewumlahlela tandla ngobe naye akayuphindza akusite.

LONKHE LIMASEKO MATSATFU.
Yonkhe indzawo inetinkhinga takhona. Wena ungatfutsa eNhlangano utsi uyekwakha eMbabane ngobe utsi kuncono khona, kantsi nakhona utawufike uhlangane netakhona lobungatati ngobe ungakahlali khona. Kususelwa ekutsini kadzeni bekuphekwa ngemlilo waphasi etiko. Lapha etiko-ke bekubekwa ematje lamatsatfu, emaseko, lebekutsi nome umlilo sewucimile wona abesolo abambe kushisa kushise nje nalandlini. Ngesintfu-ke bekubekwa emaseko lamatsatfu etiko, kute lapho bewutfola sekubekwe lesinye sibalo khona. Kuphindze kutsiwe lonkhe linabondozolwane balo.

NASOBHUZA UYAHLETJWA.
Kute lekungakhulunywa ngaye lakulomhlaba. Wonkhe umuntfu bakhona labamkhuluma kabi nome ngabe ulunge kanganani, nome angenta kahle kanganani. Kepha bakhona labatawubona emabala kuye. Kususelwa ekutsini Sobhuza abeyinkhosi beyitsandvwa kakhulu. Kepha nanaye bakhona bebamhleba.

SIBINDZI UYABULALA, SIBINDZI UYAPHILISA.
Ngemagama lankha lashiwo ngumuntfu losatidzelile, losatilahla ematsambo, losatsi akwenteke lokwentekako. Ngobe kulesinye sikhatsi nome ungati nome utawuphumelela kufuneka uvele wente sekuyobonakala khona ngobe nakaMakhanya kwatikhanyela. Ugwinye litje nje utsi sibindzi uyabulala, sibindzi uyaphilisa ngitawubona-ke lamuhla kutsi uyangibulala nome uyangiphilisa.

SILILO KASIPHELI.
NgesiSwati kulilela umuntfu lofele akupheli, ingci nje nangabe bewungekho mhla wekushonelwakwakhe. Nitakutsi mhla nibonana, ngeSiSwati, ucale umlilele, bese-ke niyachubeka niteka letinye.

TIBANJWA NGALETIKUDLAKO.
Wonkhe umuntfu unentfo layitsandza kakhulu. Uma-ke wena umfuna lapho amncane ngakhona tfola kwekutsi utsandzani, bese usebentisa loko lakutsandzako. Angitsi nje nemntfwana nabafuna angesabi kumbe usiwe kadokotela bavele bametsembise kutsi uma angenukhala bamtsengela emaswidi, nembala kuticinise kwemntfwana kuve leli lemaswidi.

TONKHE TITIBA TIYAWUGCWALA SIHLABATSI.
Kute lokungeke kuphele lakulomhlaba. Konkhe lokukhona kutawuhamba kushabalale.

UMTSAKATSI AKANCENGWA.
Umuntfu lomubi akancengwa ngesiSwati, ngobe nitabe solo nincengana naye asuke yena anente silo sengubo. Ngobe vele mubi ngusidlani, unenhlitiyo lembi.

TAGA TESISWATI

LIBUNJWA LISEVA. Umntfwana kufanele afundziswe inhlonipho nako konkhe lokuhle asesemncane, ingcondvo isasetsambile. Lokutsi libunjwa liseva kushiwo libumba, kutsi nawubumba kumele ubumbe lisesemanti lisavuma.Lesaga siyefana nalesi lesitsi lugotjwa lusemanti.

INKHOVU IPHUMA ETSANGENI.
Konkhe umntfwana langiko, ikakhulu lufuto, usuke akutsetse kubatali bakhe kungachamuki nje emoyeni. Nendlela latiphatsa ngayo ivama kusuke isuka khona kulabamkhulisile. Inkhovu ngulamanti laphuma etsangeni naliphekwa, ngumsobho walo. Angeke-ke inkhovu emlonyeni bese iyehluka kunelitsanga lephume kulo.

GUGA SITSEBE KADZE WAWUDLELA.
Kushiwo kumuntfu losagugile kantsi kumbe lwalungafakwa, nome kunentfo abedvume ngayo, kepha akasakwati ngobe umtimba ungasavumi ngenca yekuhamba kweminyaka. Utawuva-ke labo labamatiko sebatsi “hha guga sitsebe kadze wawudlela!” Sitsebe siphicwa ngetjani lokutsiwa lukhasi, atsi make uma asila etjeni abeke sitsebe sakhe kutsi lenhlama iwele kulesitsebe.

SISU SIBEKELWA NGEPHANDLE KWELUGOGO.
Ubotsi udla ucabangele likusasa ngoba kungeke kutsi ngoba udle kakhulu lamuhla sewutawusutsela nakusasa. Kepha kumele kudla ungakumosi ucabange kutsi nakusasa kusafuna udle.

INYOKA AYISHAYWA INHLOKO UNGAKAYIBONI.
Uma kunenkhinga lobhekene nayo, ungabhangateli noma uchamatele ujahe kuyisukumela. Kepha funa sisusa sayo kucala lapho isuka khona ngephambi kwekuyitsatsela tinyatsela tinyatselo. Nenyoka phela awuyishayi usabone sidvumbu kuphela inhloko ingakaveli ngobe ingakwenta kabi.

IMBIBA IDLA YETAYELE.
Umuntfu lapho ake atfola lusito khona uphindze abuyele khona lapho asenkhingeni kumbe adzinga luncedvo. Uma wake wamboleka imali utatsi nadzingile abuye kuwe, uma wake wamkhangeta lokutsite utatsi lapho akudzingile loko abuye kuwe. Imbiba luhlobo lweligundvwane, uma-ke ike yatfola sikhowa itabe solo ibuyela khona ngoba seyibonile kutsi kunekudla lapha.

INGULA LENDZALA IVAMA KUNUKA.
Kulukhuni kwekutsi umuntfu ehlukane nemikhuba yakhe, kumbe uyeba utsatsa ngelutwane, kumbe uyahleba nome ulidlabha. Kulukhuni kutsi avele akuyeke nje ehlukane nako. Nengula lesindzala ivele inuke emasi kani igeziwe nje ite lutfo ngekhatsi ngoba leliphunga alisaphumi lakuyo.

AKUBUYELWA EMUVA KUNGASIWO UMGUBHO WASHAKA.
Lokwentekile sekwentekile. Imphilo ayibuyeli emuva, kepha ichubekela embili kuphela.

AKUGEZA INGENASIYELA.
Kute umuntfu lote emaphutsa kanye netici takhe. Nguloyo unalokuhle nalokubi ngaye.

AYIHLATJWA MVUSI, IHLATJWA NGULABASEMBILI.
Umuntfu utsi angacala intfo bese kusitakala labanyenti ngayo.

BUCUBU LOBUHLE BUHAMBA NGABUBILI.
Umuntfu lophumelelako ngulonebantfu labambonisako, bameluleke. Bucubu yinyoni. Buhlala buhamba ngabubili njalo.

IMIPHANDZA IBULAWA TAKHELANI.
Umuntfu uvama kulinyatwa ngulabo lasondzelene nabo. Umphandza yimbita lenkhulu lembelwa phasi edladleni emsamo ihlale lapho yetsiwe nje.

INGUBO YALONGEKHO NGUMNTANTAMISO.
Umunfu uma angekho intfo yakhe labakhona bayatentela nje ngayo bayisebentise umatsandza.

NYOKA AYILANDZELWA NASEYISEMGODZINI WAYO.
Umuntfu ungabe solo umhlokolota ususa lichweba nome akutiba.

IYAGODLA NAYIGCULWA, YEHLISE NAYINCENGWA.
Uma wenta tintfo ngesineke uyaphumelela, kepha nawugwamandza awuvami kukutfola lokufunako. Kususelwa enkhomeni. Kuyigcula kuyisenga ngenkhani lokwenta ilugodle lubisi, kepha nawuyincenga iyehlisa.

KHISIMISI UKANYE NGEMNYAKA.
Inhlanhla ivela kanye emva kwesikhatsi, ngako kumele nayikwehlele ubonge.

LINYENTI LIYABONA BUBENDZE.
Uma intfo inebanfu labanyenti kakhulu iyonakala, ingalungi.