Ke Ngaletšane se ngaletša mošomo, magana o bona madi a kgwathe fase.
Wa Makopo ‘a masia legare, selatswa lebje lephoko, a re lebje nkane o ntanya meno.
Morodi wa tšhipi,  marata o kganya ge le hlaba ka Bokgalaka.
Ke molora wa moretšhe, le ge mahlo a khibitše, tša menong di na le seetša.
Sebone mosolosothi bo nnyane, botšiša tlou, o tla itšhatšharela.
Ga gešo re duma hlogo tša ditšhukudu, go lla noto ebile la Boroka le ya nošetša.
Ke setlogolo sa Ntsoko ramanna ka bothata ana le Madibana Seopeng, Kwena ya mosela o mo telele. Banna ba re ga e bolawe basadi ba re e sa le ye ntokwana.
Bokone, ba mo halela lehoho le di kgomo a diše, le ya mpotoko a ba mo rwadiši
Ke ya Masenyane e nya boloko, Baroka ba e nya dihlakola. Tloukgolo ya Bokgalaka, ditlou Tshubya ke ditshwene, ga bo tšona ke Bolepye.
Ke tshwene senaiwa mmele, se gana go naiwa makopong.
Khunelang tshwene letete, mogolo ga a hloke thokgola.

Thobela