Category: Uncategorized Page 11 of 12

BakaNkambule boMncube, boMsutfu, boMlandzelalanga naliyoshona emaNcubeni. Njengoba bagcwele wonkhe umhlaba nje ngete sababuka bonkhe, sitawutinta nje kulaboNkambule bemaSwati.

Ndvulondvulo bakaNkambule bebakhe eGodlwako, banatsa Luphongolo, bakhelene nebakaHlophe. Letibongo totimbili umsuka wato useGodlwako, lapho betakhelene khona.

Khokho wabo lomdzala losakhunjulwa nguMasumphe, lotele Sibangani(Mthimunye), Sibangani utele Mbandzeni, lotele Matikweni naNandzi kanye naTibati(Madvolomafisha), Matikweni yena utele Mtilankhatsa naNyezi.

Masumphe lo, kutsiwa wasala eGodlwako yena. Sibangani nangu eMbilaneni. Kuyacaca-ke kutsi bakaDlamini befikele kuSibangani, nome emaNcube acale kukhonta kaNgwane ngaleso sikhatsi. Nakushiwo vele kutsiwa lowakhomba bakaDlamini indlela kusuka ngale kweLubombo bekuyindvodza yakaNkambule leyayelapha, iphatsa emakhambi, baze bafikele eLuphongolo nje, Dlamini III akhe umuti waseZibayaneni khon’ apho etu kweLuphongolo.

Matikweni yena sewusenhla kuMatsapha, umuti wakaNkambule newakaHlophe wenyuka naSomhlolo mhla kuyiwa eMdzimba. Sebakha kuMatsapha bakaNkambule. Matikweni yingwazi lenkhulu yaSomhlolo. BakaNkambule linyenti labo lifunga yena Matikweni. Yena Matikweni utele Nyezi naMtilankhatsa.

Dzadze waboMatikweni, Nandzi wendza enkhosini Mswati wesibili, inhlanti yakhe kunguTibati(Madvolomafisha). Umuti wenkhosikati Nandzi kuseGunundvwini. Nandzi utele ingwenyama Mbandzeni(Dlamini iv). Tibati yena watala umntfwanenkhosi uLogcogco.Mbandzeni wetsiwa ngabo bakaNkambule kutsi nguMbandzeni, bametsa ngakhokho wabo. Inkhosikati uLaNkambule(Nandzi) yabulawa nguMswati ngemagama lakhulunywa yinceku yakhe Mswati, Khambi wakaSikhondze, engwenyameni. Ukhula nje Mbandzeni kasenanina, kepha la eGunundvwini nguyena Mntfwanenkhosi lomkhulu. Sekutsi muva asabekwa ebukhosini nakukhotsama inkhosi Ludvonga wesibili liGunundvu selibuya kuLogcogco lotalwa yinhlanti, njengoba nalamuhla uGunundvwini kuseyindlu yaLogcogco. Tibati Nkambule waba yindlovukati emva kwaSisile Khumalo(uLaMgangeni).

Mtilankhatsa waMatikweni nguyena asuswa kuMatsapha nguMswati, wanikwa indzawo yaseBuseleni. Sewuyakhukhumba-ke umuti wakaNkambule kudze kudze eBuseleni. EBuseleni kwakuliphakelo lemntfwanenkhosi Mgidla waSomhlolo, lokwatsi mhla asabulawa lanikwa bakaNkambule. Kufika kwabo-ke eBuseleni, njengoba nalamuhla nje baselapho. Mtilankhatsa utele Fakisandla, lotele Masibekela. Yindlu yeBuseleni leyo.

Nyezi waMatikweni yena abelapha, aphindze abe yindvuna yaSomhlolo eZulwini. Yena utele Mashila, lotele Maphokela, lotele Mjubalive, lotele Zweli. Yindlu yeMoneni leyo.

Mhambi Nkambule abenguMlondolozi ngkubutseka, ayingwazi yaSomhlolo. Sekutsi mhla kwakhiwa umuti waseMbhuleni nguMswati, kaLaMagadlela(Nandzi Khumalo), Mhambi Nkambule Maliwa Matsebula naMhlahlo Vilakati bentiwa tindvuna khona. Mhambi wakha umuti weNgabezweni phasi kweMkhingoma. Linyenti nje lalabonkhambule kusuka kubo-Warbuton kwenyuka uyosha kuboMbhuleni naboNhlazatje, lisendze laMhambi. Yena Mhambi utele Hhansi.

Danile Nkambule, asati utalwa ngubani, abeyindvuna kaLobamba wekucala phas’ eShiselweni ekhaboNdvunguya.

Ukhona naLomagwaba Nkambule lowaba yindvuna yaMahlokohla eMamphondvweni. Yena utele Myekwa.

Umhambo wabo lomkhulu bakaNkambule kulandzela lilanga, bangcwatjwa babuke enshonalanga.

Malambule.
Matsetsa.
Khotakhulu.
Dada lelabhula emanti ngemaphiko.
Nyoni leyakha kabi
Yabhekisa umlomo esitibeni,
Labanye batsi yibambeni,
Labaye batsi yiyekeni,
Yenta ngekutsandza kwayo.
Mhlumayo.

Mambane.
Mtima.
Mzomba.
Nyamatane lengadliwa
Lowasibekela Ngwane ngelutfuli.
Wena wabhasa ngesandla kuMahamba.
Tisuka letindze tenyamatane.
Vila lobovu.

Mabhengu.
Mkhonkhosi.
Lukhalo lubovu.
Mahlase.
Nyoni ledlel’ egaleni,
Letinye tidlel’ esigangeni.
Nabonkhosi.

Nkhosi.
Ginindza lomphofu netinyawo takhe.
Ludvonga lwaMavuso waNgwane
Lolway’ eMbo lwabuyelela.
Ludvonga lolwashaya phansi kwafom’ ingat’ etandleni.
Mamba lendze lesesokosweni.
Mamba lendze leyakhwacel’ umKhwakhwa neNgwavuma.
Siwelela lesimkhon’ umatima.
Sigubudvu singumuntfu, singuMswati.
Ntfulini
Sango alivalwa ngemvalo,
Livalwa ngetinhloko temadvodza.
Nkhosi.
Gwalagwala!

GININDZA

Nkhosi.
Ginindza lomphofu netinyawo takhe.
Ludvonga lwaMavuso waNgwane
Lolway’ eMbo lwabuyelela.
Ludvonga lolwashaya phansi kwafom’ ingat’ etandleni.
Mamba lendze lesesokosweni.
Mamba lendze leyakhwacel’ umKhwakhwa neNgwavuma.
Siwelela lesimkhon’ umatima.
Sigubudvu singumuntfu, singuMswati.
Ntfulini
Sango alivalwa ngemvalo,
Livalwa ngetinhloko temadvodza.
Nkhosi.
Gwalagwala!

HLOPHE

Mabhengu.
Mkhonkhosi.
Lukhalo lubovu.
Mahlase.
Nyoni ledlel’ egaleni,
Letinye tidlel’ esigangeni.
Nabonkhosi.

MAVIMBELA

Mkholo lonsundvu netinyawo takhe.
Macaca awahlali ndzawonye,
Angahlala ndzawonye ayanukelana.
Ngubo yengwenyama.
Mdlomane wetindlovu.

TSELA

Mambane.
Mtima.
Mzomba.
Nyamatane lengadliwa
Lowasibekela Ngwane ngelutfuli.
Wena wabhasa ngesandla kuMahamba.
Tisuka letindze tenyamatane.
Vila lobovu.

SIBANYONI

Malambule.
Matsetsa.
Khotakhulu.
Dada lelabhula emanti ngemaphiko.
Nyoni leyakha kabi
Yabhekisa umlomo esitibeni,
Labanye batsi yibambeni,
Labaye batsi yiyekeni,
Yenta ngekutsandza kwayo.
Mhlumayo.

DLAMINI

Nkhosi.
Dlamini.
Wena wekunene.
Wena weluhlanga lwakaNgwane.
Sidlubula dlede sakaLobamba,
Lesitsi sibadla sibe sibadlubulisa.
Wena lowabophela lubolo emfuntini,
Watsi mfati ubotala.
Sidvwabasilutfuli,
Singaba ncwaba seta nemlandzakati.
Nyatsi lemphondvo timakhenkhenene,
Yadl’ umuntfu kwanga bamhlabe ngelihloka.
Vuso leladl’ umuntfu asesiswini,
Watsi longephandle wasindza ngekutibalekela.
Mahlal’ elukhandzeni lweNyatsi,
Wentela beNyatsini khona batekubalekela.
Mangcwangu.
Samuketi sinembovu kuMalangeni.
Wen’ ungayidli imvu lemnyama,
Wesaba mafinyila.
Mamba leluhlata levuk’ etihosheni teLubhalule.
Nine lenacedza Lubombo ngekuhlehletela.
Mlangeni longanats’ emanti,
Unatsa ingati yemadvodza.
Hlubi wakucala.
Gwalagwala.
Shumi lekutsenga.

Mdluli
Nyoka
Nzimande
Mhlanti wendl`enkhulu ,
Mavovo emvula,
Nyoni leyasindvwa sisila kusuka,
Mdluli wendlovukati,
Nabonkhosi,
Wena lowatseng`emanga ngesitfole lesijoli ngembala
Esikhaleni sabhodwe

Mabuza Mshengu Shabalala lophanako

Dvonga lwaMavuso lowagadlebeta umuntfu ngokwakhe watsemba inkhani.

Ndlebe tikhanya lilanga kwatise phela kutsi tiva konkhe,

Sidvwaba silutfuli,simahhehlehhele, kwatsi phela kutsi sifihle lesibumbekile futsi lesibusisekile

ingani kuvundla khona emakhosi netinkhosana.

Wena lowacedza tinkhalo taseSwatini, takaSoshangane nakwaZulu ngekuhamba ubuta kutsi bondlebe nabo Shabalala bashonaphi.

Itsi ingaba luhlata  ngelibala, ibe ifute kaboyihlo, ingakhanya ifute kabonyoko, wena wendopi lenkhulu leyatala emakhosi. matsanga lamahle!!!

Tsine lesibeke ngenkhani sitsi bhe. asikhulumeli futsi nje sakumunya kubonina labandluliselwa, nguwe Mshengu singakhuluma kuphendvule nelitje lucobo sisho nine tihlabani, lenalwa imphi enkhabeni yeAfrika ngisho nobe labanye sebalalekile masaphokati, masaldzawo lindza, lindza wengwenyama

Mbonca ndlebanhle, ingani totimbili tikhanya lilanga.

Wena lowaya Embo wabuyelela nenhlambi wetinyamatane

KaMabuza akuvalwa ngemvalo tkuvalwa ngemakhandza emadvodza. Mabuza longalandvuli kodvwa ulandvula ngelitfodlana. wena lowakhokha siyeme wafihla umkhonto, ingani botsi umkhonto uyakubambelela. nkosi…awucedvwa Mshengu, longacedza wena angabe asikhombe imihlola…kukucedza kuyatila waNgwane …Mshengu.

Mbuyane
Mlambo!
Msibi!