Category: Uncategorized Page 7 of 12

TISHO TESISWATI

Kwetfwala tibunu- Kudvwala.
Kwephula luhleko- Kugegedzeka.
Kwentela emafayinali- kwentisisa.
kwenta letibukwako-kumangata, kuchaza.
Kuyifundza ivaliwe- kutibonela
Kuva tjwala-kweyana, kwedzelela.
Kutilahla ematsambo- Kutidzela, kutinikela.

KUHLONIPHISA INKHULUMO YASEKAMELWENI NGESISWATI.

Sive semaSwati sive lesihlonipha kakhulu. Ngaloko kunetintfo letingakhulunywa nje nganoma nguyiphi indlela.

Sizatfu lesenta letinye tintfo tingakhulunywa nganoma nguyiphi indlela sekutsi tibi temuti ngesiSwati atikhishelwa ngaphandle. Manje-ke uma sisemkhatsin’ ebantfu, noma sesikhuluma takitsi kufuneka sitikhulume ngendlela yekutsi longasilo liSwati angativa nome eva kwekutsi siyakhuluma. Lesinye sizatfu, funa kuhabule bantfwana uma sesikhuluma tindzaba letindzala kunabo tonkhe tintfo sitimisa ngesihloko.

Ngako-ke siSwati sinemagama netindlela tekukhuluma letenta emaSwati noma ngabe akhuluma indzaba lenjani, akwati kuyikhuluma angayiva lo lekungakafaneli kwekutsi ayive. Ikakhulukati nakukhuluma bantfu labadzala emkhatsini kwebantfwana noma kukhuluma emaSwati emkhatsini kwetive.

Lendlela ingaba lusito kakhulu emikhambatsini lefana nasemisakatweni lapho ukhandza khona basakati bakhuluma nje basho magama lasindzako bangabuki kwekutsi kungenteka nebantfwana balalele, funa batsatse lendlela yekukhuluma njengalengiyo, kantsi kakusiyo, love bese liyaklaluka bantfu beswela inhlonipho yekukhona kubeka inkhulumo yabo ngendlela lengiyo. Noma kumbe kulalele bantfu labangesiwo emaSwati, lokungafuneki native letinye tintfo letingemasiko nemihambo yemaSwati.

Nati tindlela letimbalwa letisetjentiswa lapho kukhulunywa tindzaba tababe namake uma basendlini bobabili. Sibonelo nje lesi, tinyenti tindzawo letihlonishwako nakukhulunywa bakaNgwane. Netemitsi nemakhambi netinyanga tinemagama ato ekuhloniphisa. Tebukhosi nekubusa live nato futsi tinetindlela tato.
—————————————————–

UMKHONO
Sitfo sababe sangansense. Ungeva nje babe akhala ngekutsi umkhono wakhe uyacandza, kawusashisi.

UMCAMELO
Sitfo samake sangansense. Nakumake ungeva kutsiwa umcamelo walomake uyashisa kumbe uyacandza.

KUNGCUNDZA INSIKA
Kuhlangana kwababe namake. Ungeva nje umuntfu lomdzala atsi, nawutakuyophengula awuyingcundzi insika njengababe. Noma babe ungamuva akhala kwekutsi lokutsite angete akhona kukwenta ngoba ungcolile, abengcundza insika.

KULALA NGETINGUBO TELUHLANYA
Buka ngetulu. Kuyefana.

KUBAMBA
Kushiwo kutetfwala kwamake. Uma kutsiwa ubambile, kushiwo kwekutsi sewukhulelwe.

KUBANJWA
Kushiwo uma umuntfu lomdvuna aphetfwe ngugcunsula, kutsiwa ubanjiwe.

KWEMBATSISA INGUBO
Kushiwo uma babe ajabulisa make, kutsiwa umembatsisa ingubo.

KWEWETA
Buka ngetulu. Kuyefana.

KUGODLELA INGUBO
Kushiwo uma make ala kwembatsisana ingubo nababe, angafuni. Kutsiwa umgodlela ingubo.

KUTSI MAKE
Kungalesikhatsi babe ancenga make kwekutsi bembatsisane ingubo. Ungamuva nje babe atsi “lomake ungigodlela ingubo. Ngitsi nangitsi make angikhahlele.”

BakaMNCINA

Ngendzabuko bakaMncina bakanye nebakaMkhwanati, Shiba kanye naboMalambe. Kuyaye kutsiwe beSutfu, lokungenteka kube liphutsa ngobe kadzeni lonkhe leli lakaNgwane kusuka eLusutfu kuya eNkomazi, kuya kuboNgwenya, boKupheleni, boMotjane naboMalolotja kubheka kuboNhlazatje, boTjakastad naboStingidolobha. Lonkhe lelo lalakhe tive letatikhuluma tilwimi letihlobene kakhulu nesiNdebele. EmaSwati-ke naleto tive abetibita ngebeSutfu.

Kutsiwa lesibongo sachamuka ngekutsi sive sakaMncina sasitsi nasivunula, bagabe lugogo lwenyamatane lamkhonweni kusuka engcoseni kuya esihlakaleni, lolugogo luvale wonkhe umkhono. Bakubita ngekuqina noma kuncina ngalolulwimi lwabo. Kwatsiwa boMncina, bantfu labancinako.

Bebakhelene naboMagagula baMnjoli bakaMncina, bakhe eDlangeni, eMdzimba, kuleli lakaGama lamuhla.Nome kungacaci kahle kutsi bebakhontile yini kumaTfombeni.Sekutsi mhla Somhlolo achitsa Mnjoli, inkhosi yebakaMagagula, nabo bakaMncina sebayachitseka emakhosi abo ayabaleka. Kutsiwa abheka kuMalutha.

Labanye kepha bakaMncina kababalekanga, babhaca eMdzimba, kulemitsandza legcwele khona. Sebayamenyetwa-ke nakuphela imphi, bayaphuma emitsandzeni bayakhontiswa kaNgwane. Sebakha umuti khona lapho eMdzimba, kwakha umnumzane lokutsiwa nguMabaleka, wakhona kaMncina, babukwa yindvuna yakhe Somhlolo, uSokhukhuza wakaHlophe. Nabo nje labatalwa nguye uSokhukhuza batikhulu kaLamgabhi. Abakhile alimile, afuyile, asebenta loMabaleka, asebenta kushuka tingogo. Nako uSokhukhuza anemkhuba wekutsi uma atenekile Mabaleka letingogo, asuke ayotiba yena.

Kamuva bakaNgwane sebahlushwa timphi takaZulu. Soyasuka uSokhukhuza utewubuta kuye Mabaleka kutsi kute yini lamatiko lonemutsi wemphi. Nguye lolatiko phela Mabaleka lonkhe lelive, nekuma kwalo. Mabaleka wamlayela bakaGama, latsi batiwa bakaMaseko kutsi bakhephi. Nako Sokhukhuza aya kumaNgcamane lamyalela laba bakaGama phasi kuMawelawela. Sewubuya nabo uSokhukhuza bakaGama beta enkhosini. Kutsiwa abayokwenta lentfo yabo phasi eLuphongolo ematubukweni lapho yakaZulu iwela khona nayita kaNgwane.

Akasekho uSomhlolo lapho, sewakhotsama. Watsi nakakhotsama wabekwa lapha eMdzimba emtsandzeni. Sekutsi nakuphela kuvuna likwindla, sewuyatsatfwa nakuya kudze kudze eMbilaneni lapho emakhosi akaNgwane abebekwa khona, abengakabekwa eMdzimba. Phela ngesiSwati sidvumbu sasingawuweli umfula ehlobo, kwakutila loko ngoba kutsiwa litawugcoba kuphele kudla emasimini. EMdzimba kucale ngaLudvonga wesibili kutsi emakhosi abekwe khona. Lapho abekwa khona uSomhlolo sekuba yindzawo lebalulekile. Sekuyababelwa nekubabelwa, umilo akufuneki ufike khona. Kubabela uSokhukhuza, ngumsebenti wakhe.

Sebalandziwe bakaGama le kuMawelawela, babekwa eMdzimba nabo bakhelana naMabaleka. Bakhile, sekuhlasela indlala lenkhulu, ivimbetela lonkhe live. Mabaleka ndzini loku ulimile nje unetilulu temabele, unetingungu letigcwele sancoti. Sebayasuka bakaGama bayokhala kuSokhukhuza, kutsi Hlophe safa yindlala. Utsi uSokhukhuza loku nami ngite lutfo, sitawutsini. Batsi boGama sitibonile tilulu taloMsutfu, tigcwele, unawo emabele. Soyasuka uSokhukhuza uhlomisa imphi yakakhe, lamajaha akaHlophe, nalaba bakaGama. Utsi ningagwazi muntfu ngoba akusiyo imphi lekhishwe yinkhosi le, uma kungachitseka ingati nawo emasondvo enyatsi enhloko kitsi. Iyaphuma-ke imphi ebusuku iyovimbetela kaMncina eMdzimba. Kutsiwe bafike nje babhule emahawu. Nembala nayifika kaMncina, iwukake umuti waMabaleka. Bhu bhu bhu emahawu! Nabavuka bakaMncina, hhawu yimphi! Nako babaleka babheka enyakatfo baze bawele iNkomazi. Nabewele iNkomazi iyabuya imphi. Sekutsiwa yakhani lapho boMncina.

Mabaleka utele Mfundza lotele Zikhotheni.

Ukhona lomunye wakaMncina, Ntantela lesingati kutsi abetalwa ngubani. Kutsiwa abeyiNyatsi ngekubutseka. Nemphini yaseMshadza, mhla kuhlaselwe Sekhukhune wahlabana. Yena-ke Ntantela wanikwa lela laseDwaleni kutsi alibuse.

Lelinye live laboMncina, uSomhlolo wakha umuti weMbelebeleni , wabeka khona inkhosikati uLaMncina, letele umntfwanenkhosi Mantintinti, lotele Mtfonga. EMaphalaleni khona kwakhiwa waseMaphalaleni, kaLaNdwandwe, uLaDzindzibele. Lonkhe lelo lalilakaMncina.

BakaMncina batila lunyawo lwenkhomo.

TINANATELO
Mncina.
Mkhwanati.
Mafuyandvuna.
Ginginini.
Nyawonkhulu.
Bikatana.
Wena wachamela esigodzini setjwala,
Wanyenyela Mkhwanati.

Tinanatelo – Zwane

Mangetse!

Zikodze waPhikela!

Zwane akadleli phasi,

Udlela emkhombeni wenyamatane.

Nselendvuna!

Lindzamkhonto!

Mabhayi kawalingani,

Langephasi nalangetulu.

Vezi lowadla sihlahla njengengwabatane.

Wena wemaNgweni!

Tinanatelo – Zikalala

Khuteni.

Cebisa.

Machaphachapha.

Masilaphepha Njegenyamatane.

Wena lokwaphambana Indlela.

Kwangaphambani inhloko.

Mhayise.

Wena ungashaywa ngendvuku,

Indvuku uyayilandzela.

Mlandvo waseNgubaneni.

Mbangalulaka.

Tinanatelo – Tfomo

Lukhambule!

Ndabezitha!

Masondv’ amhlophe netinyawo tawo.

Wena wadla dzadzewenu watsi

Akanamhlehlo akananyongo.

Mhlwazi!

Ngcamane!

Sigungu lowatfuma Khubonye waNdlovu,

Watsi akabuye nengubo yebunono.

Makhunga loncama.

Nyoka takhwel’ emtsini tingenatinyawo.

Logudza lowagudz’ emadvodza tinkhomo tawo.

Tinanatelo – Vilakati

Mphephetse weNgwedze neNgwavuma,

Lowadla dzadzewabo watsi akananyongo akanamhlehlo.

Bindza waQhayi.

Nkhosana lomncane lowasindza ngekutilamulela,

Wahamba ensimini yatondza kumila.

Khulu.

Gama kaMgabhi.

Gama wedvwa losemsengeni,

Lodlalisa ngelusiba lwajojo.

Malingakhulu waboGama.

Nkhomo tadla emabele ekulinyelwa,

Ngoba tadla emahlanga akaLaNdlela.

Tinanatelo – Soko

Mawandla!

Sichawukati!

NaboNkhosi!

Ndabaziyawo!

Nyawo timnyama ngephasi,

Timhlophe ngetulu.

Tinanatelo – Siwela

Nkhomati!

Mawelele!

Ndlangamandla!

Tinanatelo – Simelane

Mpembe.

Mnguni waseBuhleni.

Mnguni wakoNtjingila.

Wena wagicika ngesilulu eNkhalaneni.

NaboNgwane.

NaboYaka.

Ndlovu tidl’ ekhaya

Ngoba teswele belusi,

Teluswa yintfombatane Demazane.

Ndlebe timchewana,

Tachewulwa ngemagundvwane.

Ndlebe tikhanya lilanga.

NaboLokotfwako.

Lomavovokati kulaseNkhalaneni.

Ngelengele.

Lubhembedvu lumaletjana entsanyeni.

Bhozongo.

Magutjwa.