Category: Umlando Page 8 of 9

Izithakazelo nemvelaphi yabantu bakwaChili (ngosizo lwe-ulwazi.org)

Mthuyi,

Mnguni!

Qwabe kaNozidiya,

Khuzwayo! Mlamlankunzi

Ungaziyeka zibulalane

Mthatathu kaGumede,

Nin’ eniguvuzela umuntu ngehemu lakhe.

Isigogo esisind’ abatshathi.

Donga olulal’ amankentshane

Nina bas’ Ongoye.

Mbuse, Malinda

Lushaba

Ntseka

Wena owashaya insimbi ngomlenze.

Mgcwalisi wethusi,

Kholose, Ngwenya

Madlangalusuku abafokazana abadla nsukwana zonkana

Nin’ enakhahlel’ udonga kwavuleka indlela.

Nin’ enehla ngesilulu maqede kwavel’ ilanga.

Nanku umlando wabo nemvelaphi yabo kafuphi:

Imvelaphi yabantu bakwaChili ibakhomba kubantu bakwa Qwabe abangoGumede bona abaziwa njengamaNtungwa-Nguni ngokwezigaba kumaNguni.

Bona baphuma kwinzalo kaSilimana owathola igama likaChili ngenxa yokuthi ngelinye ilanga kunenqina lapho amadoda ephumile ukuyozingela, kwathi uma kuvuka inyamazane, uSilimana wayihlaba kuqala. Inxeba alishaya kuleyonyamazane layigingqa phansi yalala yathi ja. Enye yamadoda ayelapho yakwaQwabe yathatha igazi yalibhixa ngemuva kwayo inyamazane leyo. Kwaba nombango yilowo nalowo ethi ngeyakhe, uzigwazele. Kwase kuthiwa uSilimana makakhombe lapho ayigwaze khona, wakhomba lapho kwakunegazi elalinindiwe khona enye indoda. Bonke ababelapho bakhuza bathi uyachiyiza ilumbo, akunanxeba, ukhuluma ichiyo.

Kusukela lapho ke wabe esebizwa ngoChili. nozalo lwakhe lwabe seluba olukaChili. UChili wazala uFamanda, uFamanda wase emzalela uThongo. Lesisizukulwane sase sona sizala uMacala owayeyisoka lamanyala, owayeganwe ngamakhosikazi ayisikhombisa futhi enemfuyo eningi. Kulamakhosikazi kwakunondlunkulu wakhe okwabe kunguKaBhulashe Khumalo, bese ke kuba ngukaNgobe Mthembu. Inkosana undlunkulu wayo uMaMbhele.

Ekukhothameni kwakhe, uzalo lwaqoka umnawakhe okwabe kunguMnukwa ukuba abe yinkosi kodwa wenqaba uMnukwa ngezizathu ezithize azibeka. Ezinye zezaba azibeka kwabawukuthi ubukhosi buyakhulumisa, ngenxa yokuthi akathandi ukukhuluma, wase ecela ukuhoxa kulesosicelo ababesenza kuyena. Wakhala nangokuthi isizwe asikwazi ukuholwa umuntu okhonze amanzi amponjwana njengaye. Wenza isiphakamiso esiyisicelo ukuthi kungani bengabheki emadodaneni akhe ngoba nawo ayesekhulile. Leso siphakamiso sathathelwa phezulu kwase kuthi ke enye yamadodana akhe ogama layo nguBatili yagcotshwa ukuba ibe yinkosi.

UBatili wazala uMhlabeni noNkeshi, kwathi uMhlabeni wathi lapho esekhulile, wavele waqalwa ukugula ngenqgondo okwagcina uzalo selunqume ukuba kungene uBiziwe kaMnengwa owabe ezalwa ekhohlo likaMacala ukuba abambele uMhlabeni. Lapho-ke sithi uma siphenya kumlando , usivezele ukuthi ikhohlo kalibusi noma kaliyizali inkosi kodwa liyakwazi ukuzala iphosakubusa.

Ubukhosi nabo-ke babuye basuswa kulendlu baya eqadini okwabe kuyindlu kaMaDlula. IQadi phela ngokwesiko yilona elizala inkosi uma indlunkulu ingayitholi kwazise liyingane yendlunkulu ngokwesiko lesiNguni. Ubukhosi babe sebuyowela endlini kaMtitinywa kaMacala. Lona phela kwaku wuzalo lukaMnengwa kaMacala luyatholakala kwesakwaNgcolosi eMngeni kanti isizwe sonke sakwaChili nobukhosi baso sitholakala laphaya eNdwedwe. Izwe labo laziwa ngokuthi yikwaGumede.

Nansi indlela abazalwa belamane ngayo:

USilima (Chili) wazala uFamanda wazala uThongo yena owazala uMacala, uMacala wazala uZokufa, uKuyana (indodakazi) noMnukwa kuMaKhumalo. UMnukwa wazala uBatili, uBatili wazala uMhlabeni, uNkeshe, uNobelungu noNozigodo. KuMaKhumalo uMacala wazala uNhliziyo, uMziyonke, uMnengwa noThengizwe. UMnengwa wazala uMvube, uShokwakhe, uMadoda, noCupha. UMziyonke wazala uMvama, uMxhegu, uNkantolo, nabanye. KuMaDludla uMacala wase ezala uMtitinywa, uMaliba, uBafayo, noZiphelile (indodakazi). UMtitinywa wazala uNdoko (Isaya Zibokwakhe) yena ozala iNkosi Wislon Makhehlana Chili okuyiyona ebusayo noJabulani. KuMaNgcobo; uMaCala wazala uMaphupho, kuMaGumede wazala uMphamba, uMphamba wazala uGiga noBhekizitha.

Umlando wabantu bakwaZwane

Abantu bakwaZwane babizwa ngokuthi ngamaNgwe, bangamaNtungwa-Ntuli futhi badabuka enhla neAfrika, eMangweni. Iningi labo litholakala eHlobane ngaseFilidi, eMthezi, eMnambithi, ezintabe zoKhahlamba nakwezinye izingxenye zeKwaZulu Natal. UZwane uqhamuka ebukhosini bamaNgwe kwaqanjwa ngaye isibongo, kwathi ngokuhamba kwesikhathi kwabakhona nezinye izibongo eziphuma ngaphansi kwalobukhosi esingabala uCebekhulu.

UZwane uzale uMungwe, uMungwe wazala uPhikelela, uPhikelela wazala uNsela (Ndabakansele) oyinkosana noVezi. UNsele uthathe ubukhosi ngemuva kukayise. UNsele uzale uZikode yena ozale uNsele wesibili. UNsele wesibili uzale uMafu oyinkosana, uMthayi, uMandaba noNqamane. Esekhotheme uNsele kuthathe uMafu. UMafu uzale uMangethe, uLinad noMgabhi. UMangethe ube yinkosi yaseMangweni. UMangethe uzale izingane eziningi, amadodana akhe abalelwa ekhulwini esingabala uMhlaba, uMchwayo, Ntshosho nabanye.

UMangethe wakha umuzi wakubo awuqambe ngokuthi kuseMpolombeni. Lomuzi wakhiwe eduze netshe ayahlala kulo uma kuqulwa amacala esizwe noma ehlola imfuya yakhe. Ngaphambi kokuthi akhothame uMangethe ubize wonke amadodana akhe wathi awagibele etsheni lakhe kodwa ehluleka amaningi kwaba nguNtshosho owakwazi ukugibela lokhu okwenza ukuthi uMangethe ambeke njengalowo ozothatha ubukhosi ngemuva kwakhe. Itshe ayekhonze ukuhlala kulo libizwa ngokuthi yitshe likaMangethe bese kuthi idlinza (ithuna) lakhe libe kude buduze netshe.

Amakhosi akwaZwane alandelana kanje:

UMbengo uzale uMbambo. UMbambo uzale uZwane, uZwane uzale uMungwe. UMungwe uzale uPhikelela yena ozale uNsele. UNsele uzale uZikode. UZikode uzale uNsele wesibili ozale uMafu yena wazala uMangethe ozale uNtshosho. UNtshosho uzale uCengesi ozale uThinta. UThinta uzale uDumisa ozale uNkanyezi yena ozale uMhlanganyelwa. UMhlanganyelwa uzale uNtshosho wesibili obusayo. Ohlangothini lwaseMajuba ngemuva kokukhothama kweNkosi uNkanyamba kaThinta, kuphathe uNsakansaka kaNkanyama. Ngemuva kokukhothama kukaNsakansaka kuthathe iNkosi u Ayanda osabusa.

Izithakazelo zakwaZwane

Zwane, Mangethe!
Zikode, Phikelela!
Ntshosho, Nsele kaLindamkhonto!
Nina bakwaVezi!
Mthanti!

source: ulwazi.org

Izithakazelo zakwaZwide

Mkhatshwa

Zwide kaLanga!

Soshangase kSothandose

Ndwandwe waseGudunkomo

Nina bakaMneme

Nina bakaMashesh’ afike kuMashobana

Nina bakwaNkokhel’ abantu

Behlatshwa njengezinkomo

UNozinyang engafiki

Nina bakaNonhongoza

Mnguni ongafiki ngomkhonto

Nogwaza be ngahlonyulwa

Sandla sivik umkhonto njengehawu

Kukhal’ indoda namadojeyana

Wena Ndwandwe ogwaze indoda wayishi ifile

Langa!

Umlando wabantu bakwaZwide

ONxumalo kanye noNdwandwe bangabantu bandawonye. Imvelaphi yabo idabuka kubantu bakwaDlamini kaLudonga kaMavuso. Ngesikhathi kunenhlukano kwisizukulwane sikaMumbo ezintabeni zoBombo, kulapho kenabo baphuma khona.

UNxumalo abagcine sebebuzwa ngaye, kwakunguManukuza. UManukuza wayelamana noMavuso bezalwa nguLanga (uMkhatshwa). Unina kaManukuza uthe uma eshona wase eshiya uManukuza emncane. Ukhule kanzima enceliswa iminxumo. Ethi uma esekhala amncelise ngomxhuma owayebuye aziwe ngoMkhathswa. UManukuza uncele umnxumo waze waba mdala kakhulu, umzanyana wakhe wayemenzela iminxumo emteketisa ngokuthi: “Nxumalo lo, Nxumalo lo” kwabe sekuthiwa usenguNxumalo. ONdwandwe abaphuma endlini encane bona babe sebebizwa ngoNxumalo.

Umkhuba uvele ngesikhathi sekubusa uMavuso kaMkhatshwa kwaNdwandwe esethatha ingane yentombazane kaManukuza (Nxumalo) eyenza inkosikazi. Kwale noma umndeni nesizwe sikhuza umhlola ngoba phela sazi ukuthi isiko lesiNguni kalihambisani nokuganana kwabantu abazalanayo. Noma abantu bomndeni bekhuza lokho, uMavuso ubezithethelela ngokuthi yena ungowakwaNdwandwe hhayi kwaNxumalo. Uzalo-ke lukaManukuza lugcine seluhlukene nabakwaNdwandwe lwasebenzisa uNxumalo njengesibongo.

Abantu bakwaNdwandwe baqgame ngesikhathi sekubusa uZwide kaLanga kaLudonga kaMavuso. UZwide nguyena ohlanganise lesi sizwe saba ngesihlonishwayo ezizweni zabeNguni. Isizwe sakwaNdwandwe sibe yisizwe esikhulu sikanye nezinye ezinkulu njengesakwaMthethwa esasibuswa nguDingiswayo kaJobe kaKhayi, esakwaQwabe esasibuswa nguPhakathwayo nesaseMachunwini esasibuswa nguMacingwane kaJama. UZwide usakhe lesi sizwe ngokubambisana nonina, indlovukazi uNtombazi.

UZwide wakhe imizi yakhe owaKwaNongoma, owaKwaDlovunga, owasoPhiyane, owaseSigwegweni (eSikhwishikhwishi) nakwaLindizwe. UZwide ebusa KwaNongoma, ubenesitha sakhe esikhulu, iNkosi uDingiswayo waKwaMthethwa futhi udadewabo weNkosi uDingiswayo wayeganwe khona kwaNdwandwe, kodwa lobu buhlobo kababunakanga. Inkosi uZwide benonina uNtombazi, banquma ukuthi iNkosi uDingiswayo bayiganisele udadewabo weNkosi uZwide ngenhloso yokuthi iyocwiya izinsila zeNkosi uDingiswayo khona bezomlumba. Leyo ndodakazi kaNtombazi kwakunguNtombazane igama layo, uNtombazane wenza kanjalo bazithatha izinsila zenkosi bazihlanganisa nemithi yabo bamhuqa ngayo. Kuthe ngesikhathi sempi iNkosi uDingiswayo yawashiya amabutho ayo kwaSomkhele okuyilapho ayenkanise khona elinde impi yeNkosi uShaka eyabe iphuma KwaZulu. UDingiswayo uyishiya impi yakhe nje, uhamba nebutho lamantombazane nondlunkulu wakhe, bahamba bazethuka sebekwaNdwandwe kwaDlovunga.

Amabutho eNkosi uZwide ambamba ngoba ayevele emlindele, nokwaphetha ngokuthi iNkosi uDingiswayo inqunywe ikhanda lathathwa lahlobisa endlini kaNtombazi khona kwaDlovunga.

Kuleyondlu kwakugcwele amakhanda amanye amakhosi ngoba kwakuthi njalo iNkosi uZwide ihlasele isizwe, yayibulala iNkosi yaleso sizwe bese inqamula ikhanda layo ihlobise ngalo indlu kanina uNtombazi. Amanye amakhanda ayekhona lapho ngelikaMashobane noDonda bakwaKhumalo, ngelikaPhungashe wakwaButhelezi namanye amakhosi.