Mohlakoana Pholo’a Lisema!
Leila-ho-ngoatheloa,
Leila-polokoe ea maobane!
Bahlakoana ba bina pina bosiu;
Bahlakoana ba tšoana le Bataung.
A! Ekaka ba hlanyetsa senkhoana!
Oa ma-Mahlatsi,
Liea-ha-Mahlatsi ha le ke li khutla!
Oa ma-mohoma o moholo.
Ke motho oa Mosito le Napo!
ii)
Mohlakoana oa ma-Pholo’a Lisema!
Maila-ho-ngoatheloa,
Maja-polokoe-kaofela.
Bahlakoana ha ba je sengoathoana sa maobane.
iii)
Mohlakoana oa Lisema!
Ha u e-ea Tlhakoaneng u ee Mariha,
U tla teana le lipolokoe patlellong;
Hlabula teng ba futsoella bana matlung.
iv)
Bahlakoana ba ma-Napo’a Mosito!
Bahlakoana babo Pholo’a Lisema!
[Kapa: Bahlakoana babo Tau ea Tihela]Bahlakoana le ba etele Mariha,
Hoba Hlabula ba futsoella matlung;
Ke batho bas a jeng ngoathoana sa maobane,
Ba jang polokoe kaofela.
Mabeoana abo Kali’a Tšolo
Maila-ho-ngoatheloa
Bahlakoana ba tšoana le Bataung,
Bahlakoana ba bina pina bosiu.
v)
Mohlakoana oa ma-Pholo’a Lisema!
Maila-ho-ngoatheloa;
Maja-polokoe-kaofela, a e re:mph!
vi)
Mohlakoana oa ma-Nkokoto!
Hlabane Rakolojane, thoto e eme;
E ee habo Makhimisa,
Habo Kau lekhalong.
vii)
Mohlakoana oa Mahaseng!
Lepotla-potla le ja poli,
Mapena-matšoerane;
Lesisitheho le ja khomo,
Ramatenane’a Napo’a Mosito,
Oa batho ba sa jeng sengoathoana.
Mabeoana abo Kali,
Maila-ho-ngoatheloa!