Image may contain: one or more people
Lo yindlovukazi uNabotsibeni, Gwamile, uLaMatsanjana wakaMdluli. 

UNabotsibeni utalwa nguMatsanjana. Kwatsiwa nguNabotsibeni ngoba watalwa mhla uyise ahambe nemphi yaMswati kuyohlasela inkhosi yebeSutfu kutsiwa nguTsibeni libito layo. Kubuye kutsiwe nguLabotsibeni. 
Kwatsi nakufa uyise, Nabotsibeni watsatfwa ngumnakaboyise Matsanjana Mdluli labeyindvuna eLudzidzini wayawuhlala naye. Ngulapho ahlangana khona naMbandzeni, angakabi yiNkhosi Mbandzeni asesengumntfwanenkhosi waseGunundvwini.
Watfola bantfwana labane; nguBhunu, nguLomvazi,nguMalunge bese kuba nguTongotongo.
Nakukhotsama Mbandzeni waba yiNdlovukazi ngaBhunu labesayinkhosi. Kwatsi nakukhotsama Bhunu ngemnyaka we-1899 walibusa lakaNgwane abambele Nkhotfotjeni labesaseluwane lolubovu. Kwadzimate kwaba ngu-1921 lapho abekwa khona wanikwa libito laSobhuza wesibili.
Nabotsibeni wasukumisa sikhwama sekutsenga umhlaba khona emaSwati atewulima, wasukumisa sikolwa sakaZombodze, wacala lisontfo lemaSwati, waphindze watsenga umshini wekucindzetela ngobe aneliphupho lekusukumisa liphephandzaba lemaSwati.
Lokutsi kaNgwane kuze kutsiwe nguKagogo kwacala ngaye Nabotsibeni ngoba iminyaka beseyihambile, ucabange umuntfu lowendza kusaphila uLaZidze kutsi abesanganani-ke! Sekutsi nakukhulunywa ngelakaNgwane kutsiwa nguKagogo uNabotsibeni.
Wakhotsama ngewe-1925.
Nguye-ke uMlunguti wendlovu ivaliwe
Ivalwe ngemaphama etibhamu.
Mkalabhane ongadinwa ngamaveyisi
UMgwami longavutfwa nasetiko
Lowehlule timbita tebelungu nemaSwati
Mtimba longadzabuki yinhlamba yemaSwati.
INjuzalala kaMndindane kaLuvuno.
Nguye Nhlitiyo lebovu njengeyemamba.
Unyatsele iMbabane
Yase iyadvungana.
Lubhalule emant’ abovu.
Ndzindzindzi 
Unjengelitulu lemaNhlengu,
Lona litsi lidvuma
Libe lindzindzitela.
Mahlasela ngelilanga, 
Emakhosi ahlasela ngemphi.
Mashesh’ ayinike,
Ngoba uyinike kaManzini edolobheni,
Talukati takhasa ngemadvolo.
Nkhosi!
Ndlovukazi!
+ ADD CLAN NAMES

🔍 SEARCH 🔍

🎬 YouTube channel