Agee Pilusa maru,
Agee mmina Noko
Agee mathato
Agee Pilusa ya mmakhisa kha dikgomo le batho
Ke batho ba feta kgomo o tsware motho
Ke phapha madiba mollo se gola ka go bukeletsa
Ke batho bago boya bohlokohlo bo hlaba thaka, wa hlaba todi e ya mela
Gona tsokung ya Mashala wa kopeng, ga mashala tshidi ya dibata tsa naga
Gona tlase Phalaborwa ga Malatji thabeng tse pedi, ga Malatji bolla noto, gwa lla theko letsatsi le ahlaba, ke moo go bonwago bothakga
Re dinoko phoofolo e nnyane ya meetlwa, se hlonamisa diphoofolo tsa mareba bo tau le bo nkwe le bona bo tshwene se tshosetsa ka maribariba. Phoofolo eo mosegare e hlwa e robetse e tshaba meetlwa go foforega
Re batho ba bo mabilusa maru, mabilusa didiba tsa batho, ke bona batho bago kgona go kgantsa le ona marotholodi a leratadima.
Ga gesu ga mabilusa maru re supa maru pula yana ka matlorotloro, naga ya shala ele tala
Dimpa ke mararampane – hela lena methepa tswelang ntle le bone!
Le se tshoshwe ke legadima la manyokenyoke go bekenya boroka, le tsebe gore pula ya maatla ka dibe e etla
Rena ba mabilusa re ila metsi a noka, re batho bago phela ka metsi a gotswa Sedibeng
Lena banna le basadi ba motse tsiyang matsepe le megoma le lebe masemong, lapeng la mabilusa maru thoka matswele gae hlokwe
Ke lapa la makgarebe ago se tsware ba tswara marope a bona
Ke lapa labo mmakhisa, khiisa kha gona le bafiti ba tsela ba se duma, bare nkabe abe sa rena re khume re none
Kganthe rena ba Pilusa ngope ra fetsa goja rea leboga
Pula ga ene matlorotloro mabilusa weeee
Shateeeeeeee!!!!!!