Sereto sa Ga Ramosebudi
Mosia wee! Tubatse wee!
Ke Mosia Tubatse;
Ke ba Mokibi a maatla ga Ramosebudi a fase ke omile wa fetoga hlakase;
Ke batho ba Mathoka lenonya ga le mohumise, o humisitswe ke go ya letsaneng;
Makwapa ge ba mo thibela go kia, are ke kia eng ke se ngwana wa ga kwapeng;ke le ngwana wabo Mmabore was Sekhula.
Phoka sewela masogana, mesebe wesetse mereng.
Ke batho ba ga Mmamokgala a Tlou;
Mma molamodi a ntwa, molamodi motsea thoka, ke molotlhoganyi;
ke batho ba go boya tshubje la maraka pula ya tsheola la mmapinyana;
Mesedi se apea mabjabja, makhura a tswa ka dibete;
A re Selote boela tshubje gabo Mothelo ga ona di thaba; di thaba tsa bona ke mabjana mafika ke maratetjwana;
Ke batho ba ga Sekhula sa ntshawane;
Ke batho ba ga Sekhula sa nyelane, mehlape e nyela mesifa;
Ke batho ba Sebolaya Phuti Nakedi se nkga lefetla,
Ke rile ke tshela noka ya Tubatse ka gadima morago;
Noka ya go elela tlatlolo ge e elela tlase e tshaba go gogola ditshila;
Mosia wee! Tubatse wee!
ke mosia motobatsi motho wa mantsha thebe di ome di senna di omela mokobotlung.
ke motho wa ha tshele ya lebajwa la ha nkwanyane. ka tshele o tshella mang na?