BakaMavuso

BakaMavuso, boNcele, badzabuka kubakaDlamini emuva ngesheya kweLubombo emtini waMavuso waNkhosi waseNkhanini.

Batalwa nguMagudvulela waMavuso. Magudvulela lo liphosabukhosi. Liphosabukhosi kusuke kushiwo loyo labefanelwe bukhosi kepha bamphunyuka ngetizatfu letitsite. Magudvulela kwakunguye indlalifa yaMavuso. Kepha unina wakhe Magudvulela angafuni kuba yindlovukazi, futsi atsi bukhosi butawubangela umntfwanakhe emazondo nenhlupheko. Soyasuka langa lelinye kuphekwe tjwala kungumhidvo, sewutsatsa Magudvulela wenya sandla sakhe kulomhidvo loshisako. Kusuka lapho-ke Magudvulela sewuba lincele ngoba sekudla unina sewasenya emhidvweni.

Ngoba lincele kaliwubusi-ke, sebumphunyuka njalo bukhosi, njengoba sekutsiwa boNcele labakhohlwa umuti bawunika bafokatane. Umuti sewudliwa nguLudvonga umnakabo, sekuba nguye indlalifa-ke nyalo.

Magudvulela, njengoba asaliphosabukhosi nje, sewuyakhishwa lapha ekhaya. Unikwa bantfu bakhe, netinkhomo, sewuyekwakhelwa wakhe umuti khona angete abangisa Ludvonga, losekunguyena indlalifa. Sekuba kudzabuka kwesibongo sakaMavuso ngaMagudvulela umsa waMavuso.

Kusuka ngale kweLubombo, bakaMavuso beta naNgwane kuleli lakaNgwane, bakha eShiselweni lapho sibakhandza babuswa nguMhlwatsi. Mhlwatsi utele Mbhijikezi, lotele Nyangane, lotele Mahudvula, loteleSidzindzi.

Nyangane abetfula timphahla tensimbi enkhosini Mahlokohla.

TINANATELO
Nkhosi.
Mavuso.
Ncele lekhohlwa leMtimkhulu,
Lelakhohlwa umuti lawunika bafokatane.
Wena wenjojo leyaya emfuleni.
Mavuso waButwako.
Wena wakhokhotela esibayeni kaMaphanga
Ngendzaba lesabekako.