UMLANDVO WEMALANGENI
E, ngicala ngekukhuluma kancane ngesive sakaTembe, bunye baso.
Kepha-ke kucala kwami lenkhulumo ngitawucala ngekuchaza ngemakhosi, emabito awo. Emakhosi ngitawutsatsa nje abe sihlanu. Lamakhosi labesibusa sisele kaTembebe tsine namuhla lesitsi singemaSwati la.
E, kukhona inkhosi leyayibitwa ngekutsi nguNkhomikhabako. Lenye kutsiwa nguSikhulumaloyi.
Lenye kutsiwa nguSidvwabasilutfuli. Lenye kutsiwa nguMkhulunkhosi. Lenye kutsiwa nguSamketisinambova.Ngitawucala-ke lapha kuNkhomikhabako. LoNkhomikhabako ngemagama ebantfu lababili. Kwakukhona loNkhomo, sekukhona loKhabako. Batsi kube basishiye laba boNkhomo naKhabako kwase kubonakala kutsi lamagama abo kute angakhohlwakali atawufuna kutsi alondvolotwe anikwe inkhosi letawuvela ibekwe, omabili. Nembala yatsi kube ivele lenkhosi leyalandzela yase inikwa lamagama omabili kutsiwa nguNkhomikhabako.
Kwentelwa kutsi angakhohlwakali lamagama aboNkhomo naKhabako. Sase siba naNkhomikhabako-ke. Kwentelwani? Kulondvolota lamagama omabili na? Loku kwentelwa kutsi tsine maSwati sibantfu lesingakhohlwa kutsi laba labahambako basishiye, kabafi, bakhona.
Siye sibakhumbule, siyabaphahlela, ngaleny’ indlela ngulesibika kubo nasihluphekile, basikhulumele kuMkhulumnchanti.Ngako-ke laba boNkhomo naKhabako babese kutsatfwa lelibito, lamabito abo omabili ayahlanganiswa kutsiwa nguNkhomikhabako, sekwetsiwa lenkhosi. Kwentelwa kutsi lenkhosi kutebotsi nangabe kuphahlwa kutsiwe kungatsiwa nawe Nkhomikhabako, bese kuyakhumbuleka kutsi nasekushitiwo njalo nje sekushitiwo kuye Nkhomikhabako kanye nakuNkhomo, nakuKhabako. Sekuphahlelwe bantfu labatsatfu ngekusho nje libito lamunye.
NakuloSikhulumaloyi, loSikhulu abengulomunye, naloMaloyi angulomunye. Kepha-ke ekuhambeni kwabo inkhosi leyalandzela yase inikwa libito lekutsi nguSikhulumaloyi. NaloSidvwabasilutfuli, loSidvwaba ngulomunye, loLutfuli ngulomunye. Se ekuhambeni kwabo loSidvwabasilutfuli lelibito, seliphetse lalamabili.
NaloMkhulunkhosi, nguMkhulu naNkhosi, sebahlanganiselwe-ke kulenkhosi leseyibekwa. Sekuba nguMkhulunkhosi.Samketisinambova, loSamketi ngulomunye, loSinambova ngulomunye. Lengifuna-ke kutsi kukhanye kakhulu kuvakale kahle kakhulu.
NguSamketisinambova ngoba kukhona lapho umlandvo ufike ukhanyise lokutsi-ke khona lapha kuSamketisinambova.E, inkhosi, Msimudze utala bantfwana baba babili. Lomunye uba nguMswati libito lakhe, lomunye uba nguMtfonga. Babili-ke labafana.
LoMswati njengoba phela siyati kutsi ngesiSwati inkhosi ivele italwe iyinkhosi, kepha iye yetsiwe nje libito njengebantfu bonkhe. Kutakutsi-ke nase seyibekwa bukhosi bese-ke lenkhosi seyinikwa-ke libito lebukhosi nyalo. Lapha loMswati unguMswati nje unelibito lekhaya, nguSamketi, njengoba emakhosi onkhe anjalo. NguMswati nje nguSamketi. NaloMtfonga nguMtfonga nje unelibito lekhaya, nguSinambova. Baba babili labafana bandvodza yinye, baMsimudze.
Sibongo sabo sakaTembe bobabili labantfwana. Balapha ekhaya emphakatsini kaTembe, lapha la kungena khona lomfula losuka lapha eSitsatsaweni lesitsi nguMzimnyama. Ungena khona bese libito lawo ubitwa ngekutsiwa nguMtembe ngoba ngulapho kwefika inkhosi Tembe yakha khona umphakatsi. Sive sakaTembe lapho safike sakha umphakatsi khona saphatsa lonkhe leli leDalagubha.Labantfwana-ke bayahlala bayakha la. Uyabashiya-ke uyise. Nabashiyile-ke uyise sekufanele kubekwe lobekwako lotawuba yinkhosi yakaTembe.
Kubekwa-ke loMtfonga, longuSinambova. LoMswati ubangulomncane, loSamketi. Anase-ke sabekiwe loMtfonga kubonakala kokutsi loMswati longuSamketi sekufanele kutsi anikwe liphakelo unina, uphakelwa indzawo yekutsi ahambe naye ayobona kutsi utiphilisa njani lapho, ngoba kwatfolakala kutsi loMtfonga uyinkhosi letsandza kutingela. Watsandza kutsi aphatse leli lelinetinyamatane kubheka elwandle.
E, loMswati utsandza kulima, Watsandza kukhuphuka yena abuye lapha phans’ etintsaba teLubombo. Ngale emphumalanga yeLubombo. Phans’ etintsaba, ngoba utsandza kulima. Ngako-ke wanikwa liphakelo lakabo-ke. Phela ngesiSwati inkhosikati inebantfu bakayo lokutsiwa bakabobani, laba levele bayikhonte lenkhosikati kusukela isekhona laph’ emphakatsini. Kwentelwa kutsi naseyinikwa liphakelo iphume nebantfu bakayo Ngobe phela ingete yaphuma yodvwana iye ephakelweni lakayo sengatsi icoshiwe.
Uyaphuma-ke NaboMswati ulibhekisa-ke lapha phans’ etintsaba-ke lapho efika kwakhiwa khona-ke. Kuyalinywa khona-ke. Bayatiphilisa-ke khona. Usele-ke Sinambova, longuMtfonga le emphakatsini, lophetse lombuso wonkhe. Nabo laba balapha nje baphetfwe khona le. Bakhile-ke kuleli lesitsi eZibayaneni, kuleli lokutsiwa kuseLubonjeni, laphas’ eLubombo, kuye khona lapha ngetulu kweLubombo, lapha sitsi kuseMavaneni.
Balwakhile-ke Lubombo-ke.Owu! Mswati-ke naye-ke ngekube phela asayinkhosana yalapha endlini kabi sowukhontwe bantfu naye, sekukhona bantfu bakabo. Utala-ke bantfwana-ke. Kubekwa inkhosana yaMswati, iba nguNgwane wesibili. Loku ngifuna kuvakale kahle ngobe loMswati wekuqala lonaloMtfonga… Kutalwa Ngwane-ke.
Ngwane wesibili ngoba Ngwane wekucala ayiyinkhosi leyayisiphetse sisekhona leDalagubha.Ngwane-ke utala Dlamini-ke wesibili, ngoba Dlamini wekucala abesiphetse sisekhona leDalagubha. Kutalwa-ke Nkhosi, Nkhosi wesibili, umnakaboNdzimandze, umnakaboMamba, naye wesibili nje, wokuqala Nkhosi abesiphetse sisekhona le.
Kutalwa Mavuso. Mavuso umnakaboNhlabatsi, umnakaboMhlanga nabilaba. Yena-ke abewekuqala-ke loMavuso.Sekuba nguLudvonga wekucala, umnakaboLunyawo, lengikholwa kutsi laba bakaNyawo badzabuka khona. Bese kuba nguDlamini-ke wesitsatfu. Solo bayandza labantfu bayaqhubeka bayandza benela lonkhe lela live laseMavaneni eZibayaneni eLubonjeni, kuye kuyohlaba eLuphongolo. Empeleni siyeva kutsi baye befika eMkhuze.
Dlamini-ke wesitsatfu, umnakaboShabalala, umnakaboMabuza, umnakaboGinindza, njoba utakuva nje kutsi loDlamini wesitsatfu-ke ugcina ulaph’ eLubonjeni. Umntfwanakhe lotalwako-ke nguNgwane. SenguNgwane wesitsatfu lowabese sewuyasuka-ke yena sowuvele sewuhlasela tivana latitfolako. Ukhuphuka ulibhekisa-ke eShiselweni. Nguye loNgwane lotalwa nguloDlamini.
Leave a Reply