Tag: magezangobisi
uMlando wakwaMbambo:
ABANTU bakwaMbambo ba-phuma kwabakwaMthethwa, okusho ukuthi bangama-
Lala-Nguni ngokwesigaba sabeNguni. Baziwa
ngoMbambo owabe eyindodana kaJangaza
kaJobe kaKhayi wakwaMthethwa. Le ndodana
kaJangaza yayizacile, inezimbambo ezihleli
obala, yingakho yagcina isibizwa ngoMbambo.
Kuthiwa uMbambo lona wayengaganiwe futhi
engakufuni sidalo. Wayezikholisa ngabafazi
babafowabo ngesikhathi besempini. Kwathi
angabanjwa ukuthi ugila lo mkhuba, wabizelwa ecaleni kodwa akayanga lapho.
Wavele wazigibelela injomane yakhe. Ngaleso senzosakhe wabe esebizwa ngokuthi nguNjomia okwagcina sekungesinye sezithakazelo zakwaMbambo.
AbakwaMthethwa banquma ukuba bamhlasele
ebusuku engazelele. Sebemkakile, wavele
waphuma nezinkomo zakhe wagoba walingana
nazo futhi wagobisa izandla njenge-zimpondo.
Wahambake nemfuyo yakhe wayozinza
ngaseMvoti. Lapho ke wafika wakha umuzi
wathi kukwaMbambo. Ngenkathi elapho
uMbambo, waqala wakhumbula ukuthi
kufanele aganwe ma-nje ngoba babengasekho
abafazi babafowabo njengenkathi
esekwaMthethwa. Waganwa ngamakhosikazi
amane.
Wazala kakhulu, uzalo lwakhe kwaze kwathiwa
ngolwakwaMbambo. Inkosana yakhe kwaba
nguZikhohlwana. Nayeke uZikhohlwana
waganwa. Inkosikazi yakhe yayengelwa iNdiya
elabe lakhe eduzane kwabo, wagcina ezale
ingane yomfana igama layo okwabe
kunguNkobezemfe. Naye uNkobezemfe wazala
inkosana yakhe uLusongo okwagcina exabana
nomndeni ngoba umsola ngokuthakatha.
Wabaleka wayokwakha eThekwini. Nethuna
lakhe lilaphaya eZimbuzini, ngaKwaMashu.
Kunabanye abakwaMbambo abalaphaya
eNdwedwe, bonake abazibiza ngoGoba.
Bakanye nabo laba abaphuma kwaMbambo
ngoba kuthe sebehambe kakhulu, base begoba
amadolo.
Bakhona abanye abahamba bayokwakha
eMthwalume naseBulwer. Kuthe uma abelungu
sebenikeza uMqundane kaMaboyi wakwaMlaba
eMahlabathini indawo, abakwaMbambo
nabakwaVilakazi bahamba nabo okwagcina
abakwaMbambo beba ngondunankulu
bakwaMlaba. KunabakwaMbambo
abaseDundee bona abazibiza ngoChiliza kanti
uma uya eMkhambathini, kunabakwaMbambo
abazibiza ngoMdunge. Kuyavela futhi
emlandweni ukuthi endlini encane yakhona
eMaDungeni amaDunge abuye athakazelwe
ngoMageza ngobisi lwenqu….. yabafazi ba-
manye amadoda.
OMbambo baseMvoti belamana kanje: UKhayi
wazala uJangaza, uJangaza wazala uMbambo,
uMbambo wazala uZikhohlwa-na, yena wazala
uNkobezemfe yena owazala uLusongo, uLu-
songo wazala u-Isaac ozala uJotham.
OMbambo abaKwaMaphu-mulo bazalana
kanje: USikana (uNjongolozemikhonto) waza-
la uSambane (onguMavalane ibutho lakhe)
yena wazala uNtinti.
OMbambo baseNhlungwane eMahlabathini
bazalana kanje: UNdaba uzala uBhubhu
(owakha umuzi wasoDondolo) wazala
uMahawule, uSikhulumi noNomalenje.
UMahawule wakha umuzi waseNkalangiphethe
nethuna lakhe likhona lapho.
USikhulumi wakhe umuzi wakwaDingumphathi.
UNomalenje uzalo lwakhe luseNjampela
KwaNongoma. UNomalenje uzale uNdindindi
noMbhali owaphuma nomuzi wasoDondolo.
USikhulumi wazala uChwasha (uShayitshe) no
Madolo.
IZITHAKAZELO ZOMBAMBO
Mageza ngobisi lwenqu… yabafazi bamanye
amadoda, abafakozana begeza ngamanzi,
Ubambo kaludliwa ngabafokazana, ludliwa
umlandokazi, Mbiko, Mkhemezela, khethwayo,
Jangaza, Bhubhu kaNdaba, Goba ngokugoba
amadolo, Mbambo kaLushozi kaMomoyi ka
Mandlovu.